يا للي فتحت البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل غبي مخبول
أمر بفتح البتاع
لأنه كان مسطول !
وبعد فتح البتاع
جابوا الهواالمنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفرحزين مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول
احمد فؤاد نجم
هناك تعليقان (2):
اظن ان شاعر فى مكانه الشاعر العظيم احمد فؤاد نجم ميتكتبش اسمه بالبنط الصغير ده ولا فى المكان ده كان المفروض انك تكتبه فوق وببنط اكبر من كده ولا عايز تخلى اللى ميعرفش القصيده انهم يظنوا انها تخصك انت
ده شئ سئ للغايه
وياريت تحاول تكتب حاجه من عندك
لانى حاسه ان حد اللى ممليك او انك عملها copy من حته تانيه
بص يا عبدالله مش محتاج منك اى ردود لان انت الوحيد الى بتهاجمنى يا ريت بقا تسيبنى فى حالى
إرسال تعليق